ஓமானின் வெளிவிவகார அமைச்சர் பத்ர் பின் ஹமத் அல் புசைதி Badr Albusaidi இரு தரப்பினருக்கும் இடையில் செய்திகளைப் பரிமாறி இராஜதந்திர மத்தியஸ்தராகச் செயற்பட்டார்.
மத்திய கிழக்கில் போர்ப் பதற்றம் அதிகரித்து வரும் நிலையில், ஈரான் மற்றும் அமெரிக்காவிற்கு இடையிலான பேச்சுவார்த்தைகள் ஓமானில் “ஆக்கபூர்வமான முறையில்” ஆரம்பமாகியுள்ளதாக ஈரானிய அதிகாரிகள் தெரிவித்துள்ளனர்.
ஈரானிய வெளிவிவகார அமைச்சர் அப்பாஸ் அரக்ச்சி Abbas Araghchi தலைமையிலான குழுவிற்கும், அமெரிக்க விசேட தூதுவர் ஸ்டீவ் விட்கோஃப் Steve Witko மற்றும் ஜாரெட் குஷ்னர் Jared Kushner தலைமையிலான குழுவிற்கும் இடையில் இந்த முதற்கட்டப் பேச்சுவார்த்தை நடைபெற்றது. ஓமானின் வெளிவிவகார அமைச்சர் பத்ர் பின் ஹமத் அல் புசைதி Badr Albusaidi இரு தரப்பினருக்கும் இடையில் செய்திகளைப் பரிமாறி இராஜதந்திர மத்தியஸ்தராகச் செயற்பட்டார்.
கடந்த ஜூன் மாதம் ஈரானின் அணுசக்தி நிலையங்கள் மீது அமெரிக்கா நடத்திய தாக்குதல்கள் காரணமாக, இரு நாடுகளுக்கும் இடையே பாரிய “அவிசுவாசம்” நிலவுவதாக அமைச்சர் அரக்ச்சி எச்சரித்துள்ளார். ஈரான் தனது அணுசெறிவூட்டல் நடவடிக்கைகளை முழுமையாகக் கைவிட வேண்டும் என்றும், அதன் கண்டம் விட்டு கண்டம் பாயும் ஏவுகணைத் திட்டங்களைக் (Ballistic missiles) கட்டுப்படுத்த வேண்டும் என்றும் அமெரிக்கா நிபந்தனை விதித்துள்ளது.
அணுசக்தி விவகாரங்கள் குறித்துப் பேசத் தயாராக இருந்தாலும், ஏவுகணைத் திட்டம் என்பது ஒரு சிவப்புக் கோடு” Red line என்றும், அது குறித்துப் பேச்சுவார்த்தை நடத்த முடியாது என்றும் ஈரான் திட்டவட்டமாகத் தெரிவித்துள்ளது.இராணுவ வலிமையும் ஏவுகணைச் சோதனையும்
பேச்சுவார்த்தை மேசையில் இருக்கும் போதே, இஸ்ரேல் மற்றும் பிராந்தியத்திலுள்ள அமெரிக்கத் தளங்களைத் தாக்கக்கூடிய ‘கொராம்ஷார்-4’ (Khorramshahr-4) ரக ஏவுகணையைச் சோதிப்பதன் மூலம் ஈரான் தனது இராணுவ வலிமையைப் பறைசாற்றியுள்ளது. அமெரிக்கா தனது ‘யுஎஸ்எஸ் ஆபிரகாம் லிங்கன்’ (USS Abraham Lincoln) விமானம் தாங்கிப் போர்க்கப்பலை ஈரானிய எல்லைக்கு அருகில் நிலைநிறுத்தியுள்ள நிலையில் இந்தப் பேச்சுவார்த்தைகள் முன்னெடுக்கப்படுகின்றன.
பொருளாதார நெருக்கடி மற்றும் உள்நாட்டுப் பாதிப்பு
பிராந்தியத்தில் நிலவும் இந்தப் போர்ப் பதற்றம் மற்றும் கடும் பணவீக்கம் காரணமாக ஈரானிய மக்கள் பெரும் பொருளாதார நெருக்கடிக்கு உள்ளாகியுள்ளனர். அண்மையில் ஈரானில் இடம்பெற்ற போராட்டங்களின் போது 3,117 பேர் கொல்லப்பட்டதாக அரசாங்கம் அறிவித்துள்ள போதிலும், உண்மையான உயிரிழப்புகள் இதைவிட அதிகமாக இருக்கலாம் என ஐக்கிய நாடுகள் சபை மற்றும் சர்வதேச மனித உரிமை அமைப்புகள் கவலை வெளியிட்டுள்ளன.
